Craig Alexander, mellor deportista australiano do 2009

O tríatlon en Australia non deixa de ser máis ca un deporte relativamente coñecido, ben respectado, pero con todo minoritario e pouco mediático. Non obstante a cultura deportiva que se pode respirar en parques e piscinas é impresionante. Quizais proba disto é a proclamación como deportista australiano do ano a Craig Alexander por votación popular (eu entre os que o votaron). (http://www.performerawards.com.au/)

Para a xente do mundo do tríatlon sobran presentacións. Para o resto, dicir que este ano gañou por segunda vez consecutiva o Ironman de Hawaii, o berce do tríatlon, a meca soñada de calquera triatleta que se prece(http://www.performerawards.com.au/index.php?option=com_content&view=article&id=80). Repetir vitoria só estivo ó alcance de catro homes en 32 anos de historia triatlética na illa volcánica. Ademais da preparación previa, en máis de oito horas de carreira pode pasar de todo e ese todo ten que ir perfecto para se-lo primeiro en recolle-las flores hawaianas.

As comparacións son odiosas, xa o sei, pero a miña reflexión é a seguinte. Que se pasaría en España se, non digamos Raña ou Noya que xa son “un pouco mediáticos”, pero se Eneko gañase dúas veces seguidas en Hawaii? Votaríao a xente para deportista do ano por riba de Cristiano Ronaldo, Fernando Alonso ou o crack de Nadal? Ogallá o poidamos saber algún día, aínda que creo que prefiro quedar sen resposta.

A expensas da hipótese, hai que dicir que aquí en Australia recoñécese o valor e a dificultade das vitorias de Alexander “The Great”. Vence e convence por diante doutros deportistas moitísimo máis mediáticos ca el que tamén estaban nomidados. O mellor de todo é quen o xulga: a xente común.